APP下载

四驱车都可以好悭油:SubaruXV2.0i-S试驾!

消息来源:baojiabao.com 作者: 发布时间:2024-03-29

报价宝综合消息四驱车都可以好悭油:SubaruXV2.0i-S试驾!

文、摄:Tony Lam

讲真,近年唔少人买车只会睇住个油耗数字嚟拣,细 c.c. 有 Turbo 可谓首选,头辘尾辘驱动无所谓,总之最紧要悭油!四驱车?仲要无 Turbo?“唔系挂!”相信好多人听到上述两点后都即时回应呢三个字,但其实若然我话你知:“系呀,呢架 Subaru XV 四驱车都系行紧每公里 $1 左右咋。”你会唔会都即时心郁郁先?

其实近年 SUV 市场多被欧洲车厂雄霸,全因品牌效应外,其中一个最主要原因当然系引擎选择。除了大热 2.0 升 Turbo 偈外,更有不少 1.4 升 Turbo 引擎可选,集低油耗而够力好玩于一身,间接令到日本品牌慨产品被受冷落,何解?因为现行有售的日本中小型 SUV 多数配上自然吸气引擎,加上四驱系统后,自然会令人联想到唔够力又大食慨不良错觉。

但系呢,话分两头,虽然欧洲品牌引擎看似有啲优势,但其实论卖相,我就投日本牌品一票,相较欧洲 SUV 千篇一律慨设计,日本选手可谓每部都具有鲜明个性,简单啲嚟讲系你一定唔会认错。就好似今次测试呢部 Subaru XV 为例,揸出街肯定唔会俾人话似边部边部,以一身蓝撞黑慨颜色配搭示人,潮味十足,LED 头尾灯组又俾人一种高级感觉,轮圈都用埋黑银双色 Tone,后生仔一定 Buy。

中控台除咗个 8 吋触控屏外,上面仲有另一个显示,更支援 Apple CarPlay / Android Auto 资讯娱乐系统及蓝牙音讯串流功能。

呢部 Subaru XV 系全新第二代,可能你会以为同旧款差唔多,但头泵把、头灯、鬼面罩及尾灯等造型其实完全唔同,造型依旧保持 Sporty 外,亦增添咗一份贵气,唔信?打开车门睇吓你就明,首先最吸睛慨,应该非那个中控台 8 吋轻触式多功能屏幕莫属,卖相高级之余,分辨率亦相当细致,触控反应亦相当好,同你屋企部平板差唔多。不过,最吸引到我慨其实系个軚盘,直径恰到好处,握感相当唔错,设计亦极有豪华车味道,几乎所有控制都可以喺 3 点同 9 点位置揾到,加埋转档拨片,真系可以做到軚不离手,大大增加驾驶时的安全性。

天窗已列为标准配备,唔使另外加钱。
车厢的碳纤纹饰板及高级真板连橙色缝线设计,的确有型讨好。
X-Mode 下引擎输出及四轮抓力会随着路面情况而自行调校,简单啲嚟讲即系越野时或遇到烂路时可以用。
尾箱空间够晒用,一次放三四个大喼都无问题。

最后当然要讲返个驾驶感,先旨声名,本人由拥有第一部车至今,买入慨几部都系欧洲 Turbo 引擎车,日本车加上无 Turbo 真系平时试车先会接触到。讲真,试车前对于其力量没有抱好大期望,但当入 D 波俾油一刻开始,Subaru XV 俾我慨感觉系完全唔觉得唔够力,虽然相比起 Turbo 引擎那低转开始便拥出的最大扭力有明显唔同,但其实自然吸气的好处就是力量嚟得更渐进,你踩几多佢就俾几多,俾你有更好慨掌握。绝对唔似 Turbo 突如其来发力,但当一收油啲力又跌得好快慨大上大落个性,操控感一切都系好顺滑。除了系无段变速波箱的功劳外,Subaru 晒名慨水平对向引擎天生就是又静又靓,怠转时几乎没有任何声传入车厢,加上悬挂调校功夫出色,全程驾驶时慨感觉就系好静好舒服,有令人置身高级豪华房车慨感觉。至于后排乘座感,行车时我就试唔到,不过尾排的空间的确好充裕,相信除非阁下身高超过 6 呎先会觉得顶头顶脚,否则普通身高的人一定无投诉。

引擎方面一直为 Subaru 的强项,其水平对向涡轮增压引擎更早已称王称霸,今次用于 XV 身上的虽然无 Turbo(马力为 156 匹),但力量及宁静度依然出色,最重要系可以喺四驱情况下做到每公里 $1 的数字,的确好吸引。

规格表:
引擎:水平对向 4 汽缸
排气量:1,995 c.c.
最大马力:156ps/6,000rpm
最大扭力:196Nm/4,000rpm
波箱:Lineartronic CVT 七前速自动波箱
悬挂:前麦花臣、后双摇臂
传动:左右平衡式全时间四轮驱动
耗油量:7.0L/100km

售价:HK$279,800

查询:2828 2488(Motor Image)

2017-12-23 03:30:00

相关文章