旧microSD复活！十合一变身SSD神卡开箱

早两日行场见到呢张骑呢卡，插 10 张 microSD 落去就可以玩合体变 SSD，有冇咁神呀？见到大家反应咁热烈，又咁想睇张卡系咪真系咁坚（定系伏？），一于借够 10 张卡仔同大家试试佢！

呢张“microSD×10 → 2.5″ SATA”神卡一直冇正式名，说明书上面就话叫“H1001A Adapter”，大家都系继续叫佢做“神卡”吧啦！神卡可以插最多 10 张 microSD 卡仔，自动行 RAID 做一只 2.5 吋 SATA SSD 咁话，标榜唔使 Driver、唔使自己 Set 就用到，完全自动波。

H1001A 转换卡正面，每个卡槽都有列明编号，插唔够 10 张卡就要先插细数字慨卡槽

H1001A 转换卡背面

神卡最多可以装 10 张 microSD，粒芯片叫 SAGE S681BG，系咪好冷门呢？SAGE 官网话呢粒 S681 只支援到 SATA2 界面，即系 3Gb/s 带宽，大家都知系而家 SATA3（即系 6Gb/s）慨一半啦。粒芯片最多支援 10 通道传输，仲劲过一般 SSD 慨 8 通道㖞！之不过，SAGE 官网亦有写，最高读速只去到 260MB/s，写入就只去到 225MB/s，唔可以同主流 SSD 相提并论。

神卡粒芯片叫 SAGE S681BG。

相信大家都想知，到底呢只 SSD 系行咩 RAID 模式？实际上系冇写慨，因为佢当正系一般 Controller 咁运作，夹硬要讲就系类似 RAID 0，各张 microSD 慨容量加埋，又有加速效果。

到底用到几大容量同速度？假如大家系用 10 张一模一样慨 microSD，说明书就声称提供 10 倍容量，速度都系照乘 10 倍咁话。如果啲卡慨容量、速度唔同，就统统以最细、最慢果张为准，举个例：用 9 张 16GB 加 1 张 2GB，都系用 2GB 去乘 10 喇！所以呢，说明书都写明，建议用相同牌子、容量、速度慨 microSD。

装卡都唔难，有点似装Socket CPU。

如果换走、抽走、或者死咗 10 张之中慨卡，咁又会点？Sorry 喇，每次换卡或加减卡，神卡都会由头计过容量同初始化，所以缺一不可！之不过，假如你将啲卡洗下牌、又识得顺番次序装番入神卡，咁仲可以拎得番所有资料。

如果换过卡或抽走过卡，就会得番个 RAW 慨分区，要 Format 过先用到。

只要顺番装卡次序，又冇搞过张卡分区或资料，重新装番上去都可以读得番资料。

到底 10 张 microSD 加神卡，系咪真系 SSD 呢？技术上可以答你唔系，最重要一点系张卡冇做到 Wear-Leveling 同 Over-Provisioning 两样 SSD 常见技术（最起码 SAGE 官网冇提过），再加上 microSD 本身用慨 Flash 颗粒质素唔及 SSD，长期咁用法，耐用性实在存疑。

拆解到呢度先，会尽快测试再详报同大家报告！记得留意！