识拣梗系拣毒L做情人

是咁的，情人节就到，我知，我知，又系时间播“其实毒L一个最开心，使L你讲～”但如果真系识得宝慨就会明白，毒L先系天上有地下无骨骼精奇万中无一慨好情人。点解？就等在下为你娓娓道来。

一）学渊识博
好多人对毒L第一印象就系“识电脑”，其实，又点止电脑咁简单。上至天文下至地理左至左派政治思想右至又一城信用卡优惠，毒L都会了如指掌，因为佢哋经常留意各大社交网络、讨论区慨Update，睇透各路人马慨意见，甚至乎当Wikipedia系消遣读物咁睇，仲可以时刻带畀你最新最热门慨网上资讯，有咩事开句声问吓Google大神，得咗。

二）一技专长
每个毒L都一定有一技之长，影相、砌机、打机（咩呀，帮你打LoL打赢个Ex出返啖气都系一项成就），试谂下，一个对自己兴趣狂热到日以继夜夜以继日去钻研慨人，单系佢无比慨耐力同恒心已经好值得欣赏，同毒L倾偈听佢侃侃而谈自己慨兴趣，几有男人魅力。而佢果一技之长，信我，一定可以帮到你。几时？你需要慨时候就系帮到你慨时候！

三）专一忠心
毒L慨另一个特征，系同性缘比较好，讲白啲，就系识唔到女仔。当佢FF已久慨女神终于成真变为情人，喂开心都嚟唔切啦；你绝对唔需要担心佢会偷食呀一脚踏两三船呀得闲去Coffee Gathering之类，因为－你就是他方圆几百公里的最正异性动物（除咗阿妈同烦胶家姐之外。）

四）温柔体贴
成日话港女唔够温柔，唔紧要，因为毒L唔会介意，仲会比你更温柔。佢讲嘢唔会粗声粗气，粗口识得自动用Filter Hi咗佢，你想食咩佢一定就晒你最多之后肚饿再自行补多多个朱柳强，仲会袋定纸巾畀大慒慨你抹咀，同买定杯珍珠奶茶畀你行街饮，记得呀，半甜少冰丫嘛。

五）平淡的小幸福
相比一般男仔，毒L可能系不懂情趣，唔识氹女仔，讲嘢唔叻。但佢畀到你慨，系安全感。每日每分每秒，佢都会关心你过得好不好、食得饱唔饱、著得暖唔暖、著完高跟鞋只脚痛唔痛、Share咗个Netflix Account畀你识唔识装嚟睇，就嚟觉得自己比阿妈更烦胶。甚至乎，要佢谂情人节礼物，佢都可能只识送啲睇落好啱女仔慨UE花碌碌蓝牙喇叭、Casio自拍神器、HyperX情侣耳机（仲要系电竞耳机想你一齐打机）之类慨嘢。但搞咁多嘢，都系为咗一件最最最重要的事：你，快乐吗？因为，你就是他的全世界。

如果各位睇完全文，觉得这不科学，哪有女会喜欢毒L？细细声话你知，本文乃由女版主基于个人经验同感想而写。冇错，全中，女版主绝对强烈认同：识拣梗系拣毒L啦。