【有片】0-400-0km/h最高极速皇者诞生！KoenigseggAgeraRS快到癫

文：Tony Lam

车厂想要为旗下车型作宣传，实在无咩好得过为佢攞个世界最乜最物慨朵，正如早几日保时捷部 911 GT2 RS 就攞咗纽布灵北赛道最速量产车傍身，今日又轮到 Koenigsegg Agera RS 呢部顶级超跑。

介绍番，Koenigsegg 呢个瑞典超跑品牌其实存在已久，只系佢慨产品实在太超太劲，香港跟本无路俾佢行，而且部部都系天价，所以喺街见到佢慨机会实在同中六合彩差唔多。而今次破记录慨主角，就系厂方最强代表 Agera RS，佢慨心脏嚟自一台 5.0 升 V8 双涡轮增压引擎，最大马力系过千匹慨 1,160 匹，扭力就有 130.6kgm，你以为已经好夸张？错！因为佢慨对手系更劲慨 Bugatti Chiron。Bugatti 大名相信车迷应该唔会陌生，佢部 Chiron 就更是现今量产车型中最劲慨，睇佢 1,500 匹最大马力同埋 163.2 kgm 峰值扭力，0-100 公里加速只要 2.5 秒慨数字，就知佢真系坚到冇朋友。

咁究竟两部过千匹慨超跑斗乜？咪就系斗 0 - 400 – 0 km/h，即系斗快跑到 400 公里再踩停部车慨时间，之前部 Bugatti Chiron 就造出 41.96 秒慨世界记录（其实世界上都冇乜几部车跑到 400 公里）。要打破佢慨记录，Koenigsegg 当然要出尽法宝，负责慨车手系自家测试车手 Nikias Lilja，至于部 Agera RS 本身就系要攞去交俾美国买家，不过买家就好大方咁借出嚟俾佢哋做挑战，至于地点则为丹麦 Vandel 机场（已荒废，条跑道啱晒做直路挑战），虽然系咁讲，但由于跑道状态未算理想，令到可以攞嚟跑慨路段只得 2.8 公里，要做到 0 - 400 – 0 km/h 的确有啲难度。

不过，经过几次试跑，部 Agera RS 同车手喺进入状态后，正试开始时就造出静止加速至 400 公里只要 26.88 秒（好癫！），而且只要 1,958 米就搅掂，去到 403 km/h 后就即时踩 brake，喺碳纤维陶瓷制动碟帮助下，9.56 秒就由 400 公里踩停架车，距离更只要 483 米，加埋慨结果就系 0 - 400 – 0 km/h 只要 36.44 秒，轻松踢走 Bugatti Chiron，成功登上最速极速皇宝座。