【流动版大更新】第六代Core、Corem3/5/7系列登场

Intel 今次认真大堆头，除咗推出一系列 Desktop 版 Skylake 新 CPU，连流动版都全线更新，全线升级做第六代 Core i3、i5、i7 系列，连 Core M 系列都升级做 Core m3、m5 同 m7 系列。

上代 Broadwell 延迟咗唔少，Intel 今年头先推出 Broadwell-U 慨 Core i3、i5、i7 系列，四核心型号更加到六月先发布，大家都预期 Skylake 流动版冇咁快出，估唔到今次 Intel 就玩铺劲，一次过更新晒全线流动 CPU 做 Skylake 微架构。

首先系 Skylake-U 型号，即系 Ultrabook 专用慨系列，型号超过十款，遍及 Pentium、Core i3、Core i5 同 Core i7系列，TDP 有分 15W 同 28W 两款，全部都系双核心、四线程规格，Pentium 系列得 2MB L3，Core i3 系列有 3MB，Core i5 就有 3MB 或 4MB，Core i7 当然全部系 4MB 。较高阶慨 Core i3、i5 同 i7型号，都会内建 Iris Graphics 540 或 550显示核心，内建 48 个 EU 同 64MB eDRAM，规格劲过 HD Graphics 530（24 个 EU） 唔少。

跟住就轮到高效能慨 Skylake-H 型号，Core i3、i5 同 i7系列加埋有 7 款，当中 Core i5 系列两款都系 HQ 型号，行四核心、四线程同 6MB L3 Cache。Core i7 系列就升级做四核心、八线程，分为 6MB 同 8MB L3 Cache 两级规格。其中 Core i7-6820HK 个名咁奇怪，原来就系传说中慨流动版 K 仔，Notebook都玩到超频！（另有详细报道）

今次连 Core M 系列都全线更新埋，Intel 仲重新包装做 Core m3、m5 同 m7系列。其实 Core m3、m5 同 m7 慨代号都系 Skylake-Y，加埋都系得四款型号，全部行双核心、四线程同 4MB L3 Cache，连显示核心都全线一样系 HD Graphics 515，TDP 统统都系 4.5W。换句话讲，Core m3、m5 同 m7 各款型号，基本上只系时脉有分别，唔通 Intel 仲嫌而家啲型号唔够乱？

想了解多啲 Skylake 流动版慨资料，大家可以去 Intel 官网下载份 PDF 睇睇。