报价宝综合消息今时今日仲有新脑场？黄金数码广场现正招租
正当大家都讲紧脑场生意好唔掂，又多吉铺乜乜乜，但深水埗竟然仲有新脑场！黄金数码广场已经装修完，近排开始招租，Dick Sir 一于带大家去睇睇！
见到黄金数码广场呢个名，相信好多读者都会问到底喺边度？其实黄金数码广场前身系黄金中心，即系黄金同高登楼上，本来酒楼果层改建而成，入口就设喺钦州街同福荣街交界，咪即系以前上去饮茶条扶手电梯啰！之不过，相信好多读者同小记一样，落场都系搭开地铁，D2 出口过去新场入口真系要兜足成个圈，个人就认为唔太就脚喇。
新场面积有限，总共间出 34 间铺位，每间铺自然唔方大得去边。小记睇番招租资料，发现最细间铺建筑面积只得 47 平方呎，最大果间就有 582 平方呎。话晒系新装修，个场当然够晒光猛，但走廊就似乎有少少窄。至于单张话“耗资千万元高端科技设计”，小记暂时睇唔出边度咁高科技，唔通系讲紧电梯口果几个大屏幕？
|
| 大家留意下 14 同 15 号铺位，厕所门口都间到个铺出来，系咪好趣致呢？ |
小记收到风，新场铺位租金由 $4,000 至 $40,000 不等，暂时租出咗两个细铺位，唔知过多一头半个月，又会租得出几多成呢？迟下再同大家追下尾啦！
|
| 其实福荣街地铺都属于黄金数码广场，据闻变身做新场就即刻加租，呢间就话要讲 Bye bye 喇。 |
