兼逢情人节维园年宵全攻略

今年羊年的年宵撞正情人节，拍拖指定节目变成行花市，但去到年宵街里爱人一对对，人多挤迫，到底有咩有创意你钟意慨嘢值得冲破重重人墙埋身一睇呢？就等女版主率先闯入维园年宵，为大家严选五大焦点年宵货品啦！

平玩新科技 纸制VR眼镜
Google I/O 大会上曾展示一款用卡纸制成的虚拟实境（Virtual Reality, VR）眼镜，用低成本就可以玩高新科技，惊为天人。香港两位手机游戏设计师就将之发扬光大，设计出呢款全港独家的纸制VR眼镜，睇片打机都得，希望更多人可以体验到虚拟实境技术。产品包装成一盒盒模型发售，连说明书都似足模型车设计。砌好卡纸眼镜后，只要下载Android或iOS的免费App，就可以体验最新的虚拟实境科技，例如坐吓3D过山车咁。档主仲教路，钟意打PC Game例如Call of Duty、Battlefield等等，可以将画面串流到手机，再戴住VR眼镜睇住打机，包你爽丫丫！

售价：$128
摊位：101

至Warm贡品 娘娘薯片
表面上佢系一包薯片，实际内里藏有一张毛毡，档主话系寓意“娘娘收观音兵”咁话㖞，咁咪即系阿大兵可以俾到温暖娘娘啰？（误）档主仲同潮语App WhatsCap合作，下载该App有机会抽到娘娘薯片或其他产品如“出Pool蛋cushion”等等。

售价：娘娘薯片被 $238, 出Pool蛋cushion $168
优惠：Like Facebook 及 Instagram送优惠劵；下载WhatsCap App有抽奖活动
摊位：22号

任拼任搭 寿司乜乜袜
以为年宵有寿司卖，点知睇真啲—原来系袜！创作《榴梿乜乜乜》Remix慨YouTube红人JFung都系投资者之一，佢话寿司袜源自日本，佢哋将设计及质地再改良，今年第一年在年宵小试牛刀，投资约8万元。全港独家慨寿司袜，睇到都觉得O-ishi！

售价：普通寿司袜 $78一对，$198三对，特盛全Set (7对) $398，情人节限定（2月13-14日）玫瑰花袜 长长久久$99一对，三对装甜甜袜袜 $288，送即影即有相
优惠；Like Facebook及Follow IG 即减$10
摊位：235

人人期望可达到 百宝袋Cushion
适逢叮当之父藤子．F．不二雄诞辰 80 周年，全球又掀起叮当热潮。呢款叮当百宝袋造型够晒Cute，袋口仲真系装到嘢。档主话叮当令人联想返无忧无虑既童年，希望为港人在紧张悲欢既时世中带来欢乐，用百宝袋解决问题。至于版权问题，档主称曾咨询律师，指设计只令人联想起叮当，所以不构成侵权。
售价：$168
优惠：$689 五个
摊位：158

倒抽一口凉气 汽水Cushion
早排潮兴储印有人名的汽水罐，年宵场上亦有不少印有潮语的汽水Cushion；小妹严选后认为恒生管理学院学生主理的“恒羊万里”设计最精美，除了有四款潮语如“倒抽一口凉气”、“越难越爱”等选择外，樽身亦加入其他细致设计，例如Barcode设计成“狮子山”图案，成分就变成贺年祝颂语句，连到期日都要系“12015”，点解？“爱你一万年丫嘛！”档主你在跟我说吗？Yeah～好衰架啫～
售价：$200
摊位：156

花絮：

阿姐话：“买个吸尘机器人帮你吸尘，你有你慨生活，佢有佢慨忙碌，呢啲咪优质生活啰！”（$189）	家居间隔新大法之吹气铁马。（$128）

好大部饮品售卖机呀！里面一盒盒慨原来全部都系毛巾，由一群中学生设计，菊花茶同白色牛奶（羊奶？）仲系限量版添！（$128一条，$238两条，33号摊位）	头条日报今年首次在维园年宵摆档，卖潮语愿望牌，下载《头条日报》、头条POPNEWS及《头条财经报》Apps即场消费更享有折扣优惠添。（$50一个，$90两个，65号摊位）

香港人设计羊咩咩手偶，教小朋友拜年都几实用。（$108）	冲凉都挂住唱歌？毛巾都印埋歌词啱唔啱？（$88）

看到变成Tsum Tsum的比卡超，我惊呆了……	人海中找到你啦，Wally！

去年宵也要做足准备，提提大家要注意下列几点，开心去行大运至醒得你：
1. 留意最新交通安排。
2. 准备现金（或者叫另一半带多啲现金）。
3. 人多挤迫，请紧握扶手，唔系，系另一半只手，同埋照顾同行慨小朋友及长者。
4. 小心个人财物，唔好洗晒啲钱冇钱返屋企。

维园年宵地图：