美游系列－空中Wi-Fi

话说今次再去 San Jose，只系隔咗两个礼拜咁大把，响香港时差都未 Tune 返正又去过。不过今次搭慨 Airline，系好耐无坐过慨 UA，原本都无乜期望，点知上到机后就完全改观，事关编者今次搭慨 Boeing 777-300ER，咁啱系较新型号慨 77W 型号，机上慨设施都好新同齐备。

家阵新少少慨飞机都会提供 USB 充电同电掣，等乘客可以叉手机、Tablet、电脑等，有啲仲提供“空中 Wi-Fi”功能，等乘客有需要慨话，可以即时上网，初头收费较贵非一般乘客所能负担，但家阵已经唔再系旧时慨天价，就好似今次编者搭慨 UA 咁，机上慨空中 Wi-Fi 服务一粒钟收 US$8.99、两粒钟就收 US$14.99，兑返港纸大约HK$70 同 HK$120 左右，就算上足 Full flight 成程都只系 US$29.99，即系约 HK$235 度，好似编者咁由 SFO→HKG 要成 14 粒钟，唔使 HK$250 上足成程又真系好抵吓㖞！

当然空中 Wi-Fi 都有啲限制慨，就系“Internet videostreaming is not supported”，即系唔可以串流睇片啦，而一般慨 Email、Texting 同 Web Browsing 当然无问题，不过编者就察觉到坐后面嗰位乘客，见佢揸住个耳机慨咪系咁细细声讲嘢，同部手机又好有交流同互动，严重相信佢系同人玩紧 Video Call 喇，哗…咁咪搭住飞机都可以见多你几面啰！

唔单止咁，以前上咗飞机啲 Online Game 就可以一齐抖抖，家阵空中 Wi-Fi 咁抵，二百几蚊就可以继续打机，唔知响太平洋上空会出啲咩 Pokémon 呢？其实搭飞机都 On 住 line，真系唔知系咪好事喇！编者一于少理，瞓返觉好慨 Tune 返个生理时钟先！

家阵空中 Wi-Fi 咁抵，响飞机唔单止可以开工，打 Online Game、FaceTime 乜都得啦！

讲开 Game，上个礼拜简直系属于游戏迷慨一周，美国有 E3，日本亦有只注目手游 ——《キャプテン翼∼たたかえドリームチーム∼》，即系咩嚟呀？咪系《足球小将梦幻队战斗》啰！因为只 Game 系全日文界面，未必人人识玩，今期周刊就有详细解说，等粉丝可以玩得尽兴 ！

出 Game 嗰日，有等咗好耐慨编辑部同事即刻 Download 嚟玩，但编者睇住佢哋系咁首抽成半粒钟都无只似样慨 SSR 球员，不禁阴阴咀笑咗出嚟，心谂：如果响《PCM》FB 玩 Live 直播佢哋首抽……失败，应该都几过瘾㖞∼呵呵∼