伊藤の恐怖“睇”验

仲记得编者读书慨时候，都好兴睇漫画，无论系本地、日本或外国漫画都好迷慨，但又唔可以光明正大睇，如果唔系比阿妈知道我悭埋啲饭钱买漫画睇，实比人打到飞起都似，仲要扣饭钱呀！当然都有例外慨，好似《老夫子》咁，去饮茶时阿爸阿妈实会买本比我睇慨！

至于要匿埋睇慨漫画， 其中就有编者最迷慨伊藤润二啲恐怖漫画，梗系啦…比人见到实会话：乜睇埋啲咁慨恐怖嘢呀…（下删几千字，咪“哦”足半粒钟㗎！）咁我梗系好醒咁话系问同学仔借㗎，虽则都系会“哦”返十零分钟…

“算啦，佢哋又点会识得欣赏伊藤老师恐怖中渗出美学慨画风吖！”，编者唯有继续匿埋睇啦！

终于，响上个礼拜，编者可以将收埋多年慨恐怖情绪释放出嚟喇，讲紧慨系编者期待已久慨“伊藤润二恐怖美学体验大展”香港站，第一站系一年前响台湾搞慨，今次第二站到香港，响中环慨 PMQ 元创方举行，而香港站都有啲独家嘢，包括伊藤老师会将笔下主角同香港街道结合慨影像展示区，又有全球首见慨“魔之碎片”珍贵手稿，仲有由台湾著名女魔术师王子妃同名摄影师吉田舜共同创作慨“富江”摄影作品，跟伊藤润二慨漫画结合慨全新展场影片，呢啲都系香港站先有慨！

编者就最 Like 富江慨真人 Figure，就系放响影像展示区度慨，编者都情不自禁 Selfie 一下；除此之外，亦有结合智能玩意，所以记得 Download 定《伊藤润二 AR》App（iOS／Android） 先入场，入到去攞个 VR 眼镜，对住啲经典慨漫画场面，就会睇到识郁慨恐怖画面，小心被吓亲呀！仲有呀，可以睇到伊藤老师部分手稿，仲有可以整自己慨“人头气球”漫画页面！

用手机 App 配 VR 眼镜，可以睇到后面识郁慨经典场面。

仲有呀. . .仲有呀！响会场出面有个纪念品特卖场，入面有好多伊藤老师慨经典画作慨精品，有杯呀、袋呀、口罩呀、T-Shirt 呀、Poster 呀、纸胶带呀、Notebook 呀、着色绘本呀等等等等，而编者就帮衬咗“隔壁的窗户海报”同埋“暗黑美学着色绘本”，纯属个人喜好，唔系特别推荐，查实嗰度有好多嘢都想买，好似“双一口罩”，但系⋯⋯有小朋友慨读者应该会明慨⋯⋯

现场有好多精品卖，编者觉得个“双一口罩”系必买慨纪念品，但最终拣咗黑色慨“关系者以外”海报贴响公司。

想去睇慨话，展览会做到 2 月 26 号，即系仲有今个同下个礼拜，伊藤迷就梗要去朝圣，就算唔系粉丝都值得去睇吓，话唔定睇完会迷上咗伊藤老师慨恐怖美学都唔定㗎！话时话，听日（以本志见街日计）又到西方慨情人节喇，会唔会试吓带隔离嗰个去睇吓⋯⋯

“伊藤润二恐怖美学体验大展”香港站网址：www.itojunjitaiwan.tw