Google“亲生仔”PixelXL激罕杀到
话说月初 Google 发表了最新的“亲生仔”手机 Pixel,规格劲之余仲有好多人话系有史以来最靓仔的 Google 手机。正当大家谂香港几时会卖,原来水货已悄悄杀到。
小记一向都有留意 Google 自家推出的手机,今次见到 Pixel 真身后,都同好多人一样,觉得呢部系咁耐以来最靓同造功最好的“亲生仔”。今次试用到的款式系“ Very sliver ”,而且更系 5.5 吋的 Pixel XL。部机金属机身加上斜面切割机边,拿上手都几“平易近人”,没有锋利感同埋唔算重。机背上方的白色玻璃位置衬起银色机身又几型,不过要留意就系块玻璃其实有少少突起,小心有机会刮花。至于机面就冇特别,甚至骤眼睇有一两分似 iPhone 7。
规格方面,Pixel XL 使用现时最顶级的 Snapdragon 821 处理器,内置 4GB RAM(手上的为 32GB ROM ),配备 5.5 吋 2K AMOLED 屏幕同 12.3MP 主相机,绝对落足料。由于试玩时间好短,只用 AnTuTu 测试效能,得分 13 万几,比现时 Snapdragon 820 得分高少少,不过功耗方面 821 应比 820 好。
作为亲生仔,Pixel XL 当然用上最新的 Android 7 系统,更系 7.1 版本,操作体验会有少少唔同。首先系画面下方向上扫就可以拉出 Apps Menu,主页左上角则有 Google 捷径,可以直接用到各样功能,当然包括 Google Assistant。至于其他功能方面就唔多,始终系亲生仔手机,承继了原生系统没有第三方 Apps 的精简路线。
咁依家 Pixel XL 香港未正式卖,当然系水货姿态出现啦,据店主话佢都系帮熟客订机返来,价钱仲唔便宜,32GB 版已经要七千几,的确几贵下。不过小记认为依家都唔系有好多地方有得卖,贵少少都叫值,真系想入手又唔急既,可以等等。
查询:三禾电气(2374 0618)
售价:$7,880

