【平机试玩】$1,650HPStreamMini做到乜？

都唔知几耐无冲动话要买 PC，不过之前喺脑场见到返咗呢部“细细部”HP Stream Mini PC 之后，俾佢个外观同价钱吸引咗，又再令我想系厅度重新添置返部 Mini PC…

呢部 HP Stream Mini PC 个外观真系几别致，细机身放系掌上好似个汤碗咁慨大细。一听到佢卖 $1,650，就算屋企个厅本身已经放咗小米盒，但因为部机反应慢到“顶唔顺”；加上本身有自己慨 NAS，想睇片其实不求人，反而操作性更为重要，如果呢部机“行得顺”，其实真系可以完全取缔 Android Box 都仲得，所以今次借呢部机返来玩，试试佢个表现又如何？未试之前开箱睇下先～

机身设计好简单，前面开机按键同两个 USB 3.0 界面。	右侧有个 SD 卡插糟。

背面有一个 LAN（唔使一定用 Wi-Fi），两个 USB 主要插Keyboard/Mouse、另外有 HDMI、Displayport。	要打开 Stream Mini 其实好简单，只要揭起底部胶盖，打开 3 颗螺丝就得。

部机用 Haswell 架构 Celeron 2957U 处理器，不过问题系只得 2GB 内存，幸好机内有两条插槽，可以自己加 RAM（有机会影响保养要问清楚）。另外见到机身内仲有个 2.5 吋底座，不过揾唔到连接界面，所以无得升级。

部机本身用 M2 界面 SSD（虽然只得 32GB），方便日后升级。测试时尝试用 Crystal Disk Mark 测试读速去到 424.5MB/s，不过写入速度比较慢，只有 90MB/s，幸好读速快令佢开机速度不至于太慢，预设 2GB RAM 用嚟上网反应唔算特别快，开多几个 Tab 就可能要“就住就住”，不过同好多人一样，最关心系佢多媒体方面慨表现。

部机未装任何嘢之前，会有 19GB 容量左右。	好彩佢读速有 424.5MB/s，所以开机或者运行时表现都可以接受。

利用系统播放一段 4K 影片，播放效果顺畅，处理器使用率维持在一半左右。

以播放 Youtube 4K 影片时有少少问题，因为过程中利用 Chrome 及 Firefox 播放都出现“窒机”，但改用 I.E. 问题即刻改善，顺利播放 4K 影片…我都觉得好神奇…

如果大家都好似我咁系希望揾部机平平地放系厅睇片，呢个规格其实都已经可以满足到我慨基本意愿，就咁睇个规格当然唔系好“出众”，不过呢个价钱，有齐正版Windows，睇到4K片、上网速度合格又连Keyboard Mouse，日后唔够用先再考虑加 RAM 换大容量 SSD 啰，学呀“桂神”讲法，呢部机可以话系蔗渣咁慨价钱，虽然未必俾到烧鹅你，但都最少食到烧鸭慨味道，叫做交到功课啦。

又如果真系觉得效能唔够，其实佢仲有部 i3 版本，但系价钱卖 $3,799，都只系行 500GB HDD，又可能会有其他选择，咁睇就即刻觉得 Celeron 版抵用好多啰。

Spec.
处理器：Intel Celeron 2957U 1.4GHz
记载体：2GB DDR3L
储存：32GB SSD
显示：Intel HD Graphics
连接：802.11b/g/n (1×1) 、Bluetooth 4.0、GbE LAN
其他：4xUSB 3.0、1 Headphone/Mic Comb、HDMI、DisplayPort
售价：$1,650